Ibong Adarna | Salin sa Tagalog

Balagtasan

Ang Ibong Adarna Chapter 1 ay isinalin sa Wikang Filipino ni Francis Morilao

Ang Ibong Adarna ay may 1,722 saknong (stanzas)
Ang Unang Bahagi ay naglalaman ng 256 saknong.

Nawa'y makatulong ito sa inyong takdang aralin.

Birheng Inang marikit emperadora sa Langit Tulungan po yaring isip, matutong makapagsulit. Sa awa mo po't talaga, Birheng walang makapara Akong hamak na obeha, hulugan nang iyong grasya. Dila ko ay iyong talasan, pawiin ang kagarilan At nang mangyaring maturan, ang munting ipagsasaysay. At sa tanang nangarito, nalilimping awditoryo Sumandaling dinggin ninyo, ang sasabihing korido. Na ang sabi sa historia, nang panahong una-una Sa mundo ay nabubuhay pa, yaong dakilang monarka. At ang kaniyang esposa, yaong marikit na reyna Ang pangala't bansag niya, ay si Doña Valeriana. Itong hari kong tinuran, si Don Fernando ang ngalan Ang kaniyang tinubuan, ang Berbaniang Kaharian. Ang haring sinabi ko, na ay may tatlong anak Sila'y tuturan ko't ibabadya, nang inyo ngang makilala. Si Don Pedro ang panganay, na anak nang haring mahal At ang ikalawa naman, si Don Diego ang pangalan. Ang ikatlo ay si Don Juan, ito ay siyang bunsong tunay Parang araw na sumilang, sa Berbaniang Kaharian. Ito ay lalong mahal baga, sa kapatid na dalawa Salang malingat sa mata, ng kaniyang haring ama. Para-parang nag-aaral, ang manga anak na mahal Malaki ang katuwaan, ng hari nilang magulang. Ay ano ay nang matuto, na yaong tatlong anak niya Ay tinawag kapagdaka, nitong dakilang monarka. Lumapit na kapagkuwan, ang tatlong prinsipeng mahal Kordero ay siyang kabagay, nag-aantay pag-utusan. Anang hari ay ganito, kaya ko tinawag kayo Dito sa itatanong ko, ay sabihin ang totoo. Linoob nang Dios Ama, na kayo ay nangatuto na Mili kayo sa dalawa, magpare o magkorona. Ang sagot nila at saysay, sa hari nilang magulang Kapuwa ibig magtangan, ng korona't, setrong mahal. Nang ito ay marinig na, ng haring kanilang ama Pinaturuan na sila, na humawak nang espada. Sa Dios na kalooban, sa kanilang pag-aaral Di nalao ay natutuhan, ang sa armas ay pagtangan. Ito ay lisanin ko muna, yaong pagkatuto nila At ang aking ipagbadya, itong dakilang monarka.

 

Ang Panaginip ni Haring Fernando

Nang isang gabing tahimik, itong Hari ay naiidlip; Kapagdaka ay nanaginip, sa hihigan niyang banig. At ang bungang panagimpan, nitong Hari kong tinuran; Ang anak na si Don Juan, pinag lilo at pinatay. Ang dalawang tampalasang, sa kaniya ay pumatay; Inihulog at iniwan, sa balon ng kalaliman. Sa pananaginip baga, nitong mahal na monarka; Nagbangon kapagkaraka, sa hihigan niyang kama. At hindi na nga naidlip, sa malaki niyang hapis; Sa hirap na masasapit, niyong bunsong iniibig. Ito ang niyang dahilan, nang sa bungang panagimpan; Tuloy ipinagkaramdam, at sa banig ay naratay.

 

Nagpatawag nanga rito marurunong na medico Dili masabi kun ano ang sakit nang haring ito. Sa gayong karami baga medikong tinawag nila Ay walang makapagbadya sa sakit na dinadala. Ay mayroon namang isa na bagong kararating pa Siyang nagpahayag baga sakit nang bunying alteza. Ang damdam mo haring mahal ay galing sa panagimpan Sa iyo ay aking tuturan ang iyo pong kagamutan. May isang ibong maganda ang pangalan ay Adarna Kun marinig mong magkanta ang sakit mo ay giginhawa. Sa Tabor na kabundukan ang siyang kinalalagyan, Kahoy na hinahapunan Piedras Platas ang pangalan. Kun araw ay wala roon itong enkantadang ibon, Sa iba sumasalilong at nagpapawi nang gutom. Kun gabing katahimikan walang malay ang sino man, Ay siyang pag-uwi lamang sa Tabor na kabundukan. Kaya mahal na monarka yao ay siyang ipakuha, Gagaling pong walang sala ang sakit mong dinadala. Nang sa haring mapakinggan ang kaniyang kagamutan, Kapagdaka ay inutusan ang anak niyang panganay. Si Don Pedro ay tumalima sa utos nang haring ama Iginayak kapagdaka, kabayong sasakyan niya. Yao nanga't lumakad na, kabundukan ang pinunta At hahanaping talaga, mahal na ibong Adarna. Mahigit na tatlong buwan, paglakad niya sa parang At hindi nga maalaman, ang Tabor na kabundukan. May dinatnang landas siya, mataas na pasalunga Tumahan kapagkaraka, itong prinsipeng masigla. Sa masamang kapalaran, sa Diyos na kalooban Nang dumating sa ibabaw, kabayo niya ay namatay. 'Di anong magagawa pa, wala nang masakyán siya ng bastimento ay kinuha, at lumakad kapagdaka. Sa Dios na kalooban, na sa tanong bininyagan Dumating siyang mahusay, sa Tabor na kabundukan. May kahoy siyang nakita, na tantong kaaya-aya Sa kaagapay na iba, siyang tangi sa lahat na. Ang dahon ay sakdal nang inam, para-parang kumikinang Diamante ay siyang kabagay, sa mata ay nakasisilaw. Ang naisipan nga niya, sa loob at ala-ala Doon na tumigil baga, itong prinsipeng masigla. Ang nasok sa kalooban, ang kahoy na ito ay Siyang marahil hinahapunan, nang ibong kong pinag-lakbay. Ay ano ay nang gagabi na, ang araw ay lulubog na Madlang ibon ay narito na, at manga kawan ang iba. Sa gayong daming nagdaan, walang dumapo isa man Nagulo ang gunam-gunam, nitong prinsipeng timtiman. Ganitong dikit na kahoy, walang ibong humahapon Ako ay dito nalingatong, paghihintay kong malaon. Ang nasok sa ala-ala, sa loob niyang mag-isa Ang siya ay magpahinga, at bukas lumakad siya. Humilig nanga't sumandal, doon sa kahoy na mahal Sa malaking kapaguran, siya ay tambing nagulaylay. Ay ano ay nang tahimik na, ang gabí ay lumalim na Siya nangang pagdating na, niyong ibong enkantada. Dumapo na siyang agad, sa kahoy na Piedras Platas Balahibo ay nangulag pinalitan niyang agad. At kapagdaka ay nagkanta, itong ibong enkantada Ang tinig ay sabihin pa, tantong kaliga-ligaya. Ang prínsipe ay hindi na, nakaringig nang pagkanta Pagtulog ay sabihin pa, himbing na walang kapara. Ang sa ibong ugali na, kung matapos na magkanta Ay siyang pag-tae niya, at matutulog pagdaka. Sa masamang kapalaran, ang prínsipe ay nataihan Ay naging bato ngang tunay, ang katawan niyang mahal. 'Di anong magagawa pa, nang siya ay maging bato na, Paghihintay sabihin pa, nang haring kaniyang ama. At nang maging isang-taon na, hindi dumarating baga Inutusan kapagdaka si Don Diegong pangalawa. Sumunod at 'di sumuway, sa hari niyang magulang Iginayak kapagkuan, kabayo niyang sasakyan.

Previous Next